انا هقولكم النهاردة على سر الكشرى 
اولا المقادير على حسب تقديرك وافراد اسرتك لانى بصراحة بعملة كدة بالبركة وهنحضر بقى رز وشعرية وعدس وطماطم وحمص الشام ومكرونة اسباجتى ومكرونة صغيرة وثوم مدقوق وبصل نيجى بقى لطريقة التحضير هنمسك حاجة حاجة
العدس هنجيب العدس وونغسلة كويس وبعدين نسلقة ونراعى زيادة كمية المية لو نقصت علشان هنحتاجها بعد كدة وبعدين ما يتسلق بس مش اوى هنصفى المية فى طبق ونسيبها على جنب وناخد العدس ونجيب طاسة ونحط فى نقطة زيت وشوية توم صغيرين ونحمرهم فى الزيت وبعدين نحط العدس ونضيف علية ملح وفلفل اسود وكمون وبهارات ونسيبه يتشوح شوية وبعدين نطفى علية
الصلصة ممكن نعملها بتوم بس وممكن نعملها بتوم وبصل علشان تبقى خفيفة ومتتعبش القاولون المهم هنحمر بصلة فى الزيت وبعدين ما تصفر شوية هنحط عليها التوم ويتحمروا سوا وبعدين نضيف الطماطم المعصورة ونحط عليها ملح وفلفل وبهارات وشوية خل صغيرين ونسيبها لحد لما تتسبك
الارز لعمل الارز بقى هنجيب بصلة صغيرة ونحمرها فى شوية زيت وبعد ما تصفر هنضيف الشعرية وبعد ما تتحمر مع البصلة هنحط الارز ونشوحهم ثوانى وبعدين هنسقى الارز بمية العدس اللى احنا شيلنها من سلق العدس ولو احتاج طبعا هتزودية وبكدة هيكون لونة بنى وطعمة جميل وممكن نعمل الشعرية لوحدها بس للسرعة بعملها مع الارز
اما المكرونة فطبعا هنسلقها عادى جدا فى مية وملح
نيجى بقى لاهم حاجة وهى الدقة بتاعة الكشرى والبصلة المحمرة
دقة الليمون هنجيب توم مدقوق مع فلفل اخضر حار ونتبلة بملح وفلفل اسود وكمون وبهارات وليمون وخل وبعدين ندفى مية ونحطها على التوم ونقلب علشان يختلطوا والمية طبعا بتبقى كتير
دقة الشطة هنجيب حوالى نص كوب طماطم معصورة ونضيف عليها من التوم المدقوق مع الفلفل وشطة كتير شوية وملح وفلفل وخل وليمون وطبعا مش كتير يعنى شوية خل صغيرين ونص ليمونة ونزودها شوية مية صغيرين ونحطها على النار يادوب تاخد غلوة ونطفى عليها وطبعا نراعى الملح فى كل حاجة
وفى الاخر البصلة تقطعى البصلة شرايح ونحمرها فى الزيت ونرشها بشوية ملح وبعدين نصفيها ونطلعها على ورق نشاف وبكدة نكون خلصنا الكشرى هو جاتة كتير شوية بس والله مش بياخد وقت خالص وطعمة خراااااااااااااااااااااااافة وهتجربى وتشوفى
وعلشان تخلصى على طول اسلقى العدس ووهو بيتسلق اعملى الصلصة وسيبى شوية طماطم علشان الدقة وبعد ما العدس يتسلق شوحية زى ما قلت وبعد كدة فى نفس الطاسة حمرى البصلة وبعد كدة اعملى الدقات بتاعة الكشرة كدة مش هيبقى فاضل غير الرز اعملية وسيبية يستوى وهو بيستوى اسلقى المكرونة ورصى الطبق وكولى وادعيلى
منقول من dodo fr
